Pri regadaj sistemoj kaj la rajtoj de individuoj
El la ĉapitro 4/4
La registaro kaj la instancoj ĉiam nur tiukaze estas alvokataj, se perforto de la persono kaj de la rajtoj de la individuo estas praktikata. La individuo ne havas rajtojn, kiam la ŝtato volas fari negocojn. Sed kiu estas la ŝtato? Kaj kiu estas tiu, kiu opinias sian personan opinion kiel la sole ĝustan opinion laŭ kiu la bonfarto de la ŝtato estu prijuĝata? Estas individuo aŭ kelkaj individuoj, kiuj interkonsentiĝis pri komuna opinio rilate al tio, kio estas helpema al la ŝtato kaj la nacio. Estas ĉiam la individuo, kiu estas perfortata, se eta grupo de demagogoj posedas sufiĉe da brutaleco kaj kapablo pri persvado trudi al ĉiuj ceteraj homoj sistemon. Kiel la sistemo nomiĝas, tio estas indiferenta. Ĉu iu sistemo estas utila aŭ malutila al iu popolo, ne dependas de la sistemo. Laŭ ĉiu sistemo popoloj povas esti administrataj, ĉu je ties utilo aŭ je ties malutilo. Dependas de la individuuoj kiamaniere ili efektivigas tiun aŭ tiun sistemon; ĉar ekzistas nek bonaj nek malbonaj registaraj sistemoj. Kaj ne estas sistemo, kion ajn preĝas la propagandistoj de tiu aŭ de tiu sistemo, kiu povus feliĉigi kaj kontentigi almenaŭ kvaronon de la homoj, al kiuj la sistemo estu uzata.